About us

ಶ್ರೀಯುತ ಕುಮಾರ್ ಉಪ್ಪಾರವರು ಶಿವಮೊಗ್ಗ ಜಿಲ್ಲೆಯ ಸೊರಬ ತಾಲೂಕಿನ ಬಾರಂಗಿ ಗ್ರಾಮದಲ್ಲಿ ಜನಿಸಿ ಹಳ್ಳಿಯ ಬಡತನದ ಬೇಗೆಯ ನಡುವೆ ಶಿಕ್ಷಣ ಪಡೆದು, ಬಾಲ್ಯದಿಂದಲೇ ಈ ಸಮಾಜದ ಬಡ ಸಮುದಾಯದ ಉದ್ಧಾರಕ್ಕಾಗಿ ಯಾವುದಾದರೂ ಒಂದು ಮಹತ್ತರ ಸುಧಾರಣೆ ಕೈಗೊಳ್ಳಬೇಕೆಂಬ ಕನಸು ಕಂಡವರು. ಹಲವಾರು ಸಂಕಷ್ಟಗಳ ನಡುವೆ ಸವಾಲ್ ಎಂಬಂತೆ ತಮ್ಮ ಶಿಕ್ಷಣ ಪಡೆದು ಅತ್ಯಂತ ಚಿಕ್ಕ ವಯಸ್ಸಿನಲ್ಲಿಯೇ ಪ್ರತಿಷ್ಠಿತ ಕಂಪನಿಯೊಂದರಲ್ಲಿ ಮಾರಾಟ ಪ್ರತಿನಿಧಿಯಾಗಿ ಸೇರುವುದರ ಮೂಲಕ ತಮ್ಮ ವೃತ್ತಿ ಜೀವನವನ್ನು ಆರಂಭಿಸಿ ಹಲವಾರು ಸವಾಲುಗಳ ನಡುವೆ ಉತ್ತಮ ಸಮರ್ಪಣ ಮನೋಭಾವ ಹಾಗೂ ಛಲದಿಂದ ಹಂತ ಹಂತವಾಗಿ ಬಡ್ತಿ ಪಡೆಯುತ್ತಾ ಮಾನವ ಸಂಪನ್ಮೂಲ ನಿರ್ವಹಣಾಧಿಕಾರಿಯಾಗಿ ಕಾರ್ಯನಿರ್ವಹಿಸುತ್ತಾ ಇಂದಿನ ಈ ಕೌಶಲ್ಯಾಧಾರಿತ ಸ್ಪರ್ಧಾತ್ಮಕ ಯುಗದಲ್ಲಿ ನಗರ ಪ್ರದೇಶದ ಕಂಪನಿಗಳಲ್ಲಿ ಉದ್ಯೋಗ ಪಡೆಯುವ ಸಲುವಾಗಿ ಗ್ರಾಮೀಣ ಜನತೆ ಅನುಭವಿಸುತ್ತಿರುವ ಸಂಕಷ್ಟಗಳು ಹಾಗೂ ಪರಿಹಾರವೆಂಬಂತೆ ಗ್ರಾಮೀಣ ಭಾಗದ ಉದ್ಯೋಗ ಆಕಾಂಕ್ಷಿ ಯುವ ಜನತೆಗೆ “ಕ್ಯಾಂಪಸ್ ಟು ಕಾರ್ಪೊರೇಟ್ ಟ್ರೈನಿಂಗ್ ಪ್ರೋಗ್ರಾಮ್” (Campus to corporate Training program) ಅಂದರೆ ಉದ್ಯೋಗ ಆಧಾರಿತ ಕೌಶಲ್ಯ ತರಬೇತಿ ಶಿಬಿರ ಎಂಬ ಕಾರ್ಯಕ್ರಮದಡಿಯಲ್ಲಿ ಇಡೀ ರಾಜ್ಯಾದ್ಯಂತ ಸುಮಾರು 70,000ಕ್ಕೂ ಅಧಿಕ ಯುವಜನತೆಗೆ ಕೌಶಲ್ಯಾಧಾರಿತ ತರಬೇತಿ ನೀಡುವುದು ಮಾತ್ರವಲ್ಲದೆ ಇದರ ಮುಂದಿನ ಭವಿಷ್ಯಕ್ಕೆ ಔದ್ಯೋಗಿಕ ಬುನಾದಿ ಒದಗಿಸಲು ರಾಜ್ಯದಾದ್ಯಂತ ಹಲವಾರು ಜನಪ್ರತಿನಿಧಿಗಳು ಹಾಗೂ ಸಚಿವರುಗಳು ಸಂಸದರು ಶಾಸಕರು ಮತ್ತು ಅನೇಕ ಸಂಘ ಸಂಸ್ಥೆಗಳ ಸಹಯೋಗದೊಂದಿಗೆ ಸುಮಾರು ಐವತ್ತಕ್ಕೂ ಹೆಚ್ಚು ಉದ್ಯೋಗ ಮೇಳಗಳನ್ನು ಆಯೋಜಿಸಿ 3 ಲಕ್ಷಕ್ಕೂ ಹೆಚ್ಚು ಯುವಕ ಯುವತಿಯರಿಗೆ ಉದ್ಯೋಗವನ್ನು ದೊರಕಿಸಿ ಕೊಟ್ಟಿರುತ್ತಾರೆ.
ಹಾಗೂ ಬಡಜನರ ಆರೋಗ್ಯ ದೃಷ್ಟಿಯಿಂದ ಆರೋಗ್ಯಮೇಳ ರಕ್ತದಾನ ಶಿಬಿರ ಮತ್ತು ನೇತ್ರ ಶಸ್ತ್ರ ಚಿಕಿತ್ಸಾ ಶಿಬಿರಗಳನ್ನು ಆಯೋಜಿಸಿ ಬಡ ರೋಗಿಗಳಿಗೆ ದಾರಿದೀಪವಾಗಿದ್ದಾರೆ. ಕರ್ನಾಟಕದಲ್ಲಿ ಖಾಸಗಿ ಕಂಪನಿಗಳಲ್ಲಿ ಇರುವಂತಹ ಖಾಲಿ ಹುದ್ದೆಗಳು ಕನ್ನಡಿಗರಿಗೆ ಸಿಗಬೇಕು ಕನ್ನಡಿಗನಿಂದ… ಕನ್ನಡಿಗರಿಗಾಗಿ… ಕನ್ನಡಿಗರಿಗೋಸ್ಕರ ಎಂಬ ದ್ಯೇಯದೊಂದಿಗೆ “ಕನ್ನಡ ನೌಕರಿ” ಎಂಬ ಸಂಸ್ಥೆಯ ಮೂಲಕ ಕನ್ನಡ ನಾಡಿನ ಯುವ ಜನತೆಗೆ ಉಚಿತ ಉದ್ಯೋಗದ ಮಾಹಿತಿಯನ್ನು ಕೊಡುತ್ತಿದ್ದಾರೆ. ಈ ಮೂಲಕ ಖಾಸಗಿ ಕಂಪನಿಗಳಲ್ಲಿ ಖಾಲಿ ಇರುವಂತಹ ಉದ್ಯೋಗಗಳ ಮಾಹಿತಿ ಉದ್ಯೋಗವನ್ನು ಹುಡುಕುತ್ತಿರುವಂತಹ ನಿರುದ್ಯೋಗಿ ಯುವ ಜನತೆಗೆ ಬಹಳ ಸರಳವಾಗಿ ತಲುಪಿಸುವಂತಹ ಕಾರ್ಯವನ್ನ ಮಾಡುತ್ತಿದ್ದಾರೆ.